வியாழன், 8 செப்டம்பர், 2016

அந்தகக்கவிப் பேரவை



அந்தகக்கவிப் பேரவை

தமிழ் உறவுகளுக்கு வணக்கம்,
பார்வையற்றோர் தங்கள் தமிழறிவை மேம்படுத்திக்கொள்ளும் பொருட்டு இப்பேரவை உருபெற்றுள்ளது. எழுத்தாற்றல் பேச்சாற்றல் ஆய்வுத்திறன் மற்றும் தமிழ்நுட்பத்திறன் போன்றவற்றில் தங்களை வளர்த்துக்கொள்ள, தங்களைத் தாங்களே பயிற்றுவித்துக்கொள்ள தோன்றியது அந்தகக்கவிப் பேரவை. இப்பேரவை உருவான விதம் பின்வருமாறு.
பல ஆண்டுகளாக சத்யசாய் பக்தர்கள்  வள்ளுவர் கோட்டத்தின் அருகில் உள்ள பத்மசேஷாத்ரி பள்ளியில் ஒவ்வொரு ஞாயிற்றுக் கிழமையும் பார்வையற்றோருக்கு புத்தகங்களை  வாசித்தும், ஒலிப்பதிவு செய்தும் வழங்கி வருவதை அனைவரும் அறிவோம். இச்சேவையின் மூலம் பயன்பெற்று உயர்ந்தநிலையை அடைந்தவர்கள் பலர். இந்த வாசிப்பகத்திற்கு சென்று பயன்பெற்ற சிலர், வாசிப்பகம் முடிந்ததும்  சிறுக்கூட்டமாக கூடி இலக்கியம் உள்ளிட்ட பல செய்திகளைக் கலந்துரையாடி வந்தனர். இப்படி பல செய்திகளை வரையறையின்றி  பேசுவதற்கு பதிலாக  முறையான கூட்டமாக நெறிப்படுத்தி கலந்துரையாடலாம் என்று முடிவு செய்யப்பட்டது. அதன் விளைவாக தோன்றியதே அந்தகக்கவிப் பேரவை. இப்பேரவைக்கு அந்தகக்கவிப் பேரவை என்று பெயரிட காரணம் என்ன என்பதை இனி காண்போம்.
தொல்காப்பியன், வள்ளுவன் கம்பன், பாரதி என தமிழை வளர்த்தெடுத்து நிலைநிறுத்தியப் புலவர்கள் பலரும் வான்முட்டும் புகழ்ப்பெற்று வாழ்ந்து வருகின்றனர். அந்த  அளவிற்கு இல்லை என்றாலும் எங்கள் அந்தகக்கவியை ஓரளவேனும் நினைவில் இருத்தி, அவரை உயர்த்தி பார்வையற்றோரை தமிழ் உலகிற்கு அடையாளப்படுத்தும் பொருட்டு இப்பெயர் இடப்பட்டது. அந்தகக்கவி வீரராகவ முதலியார் குறித்த சில குறிப்புகள் பின்வருமாறு.
·         இவர் தொண்டை நாட்டில் பிறந்தவர்.
·         பிறவியிலேயே பார்வையற்றவர்.
·         முதுகில் எழுதச்சொல்லிக் கற்றவர்.
·         கவிஞர், இசைஞானம் உள்ளவர், ஆசிரியர்.
·         பிள்ளைத்தமிழ், கலம்பகம், உலா, கோவை போன்ற இலக்கியங்களைப் படைத்தவர்.
·         இலங்கைக்கு சென்று அரசன் பரராசசிங்கனிடம்  தம் கவிதைக்காக பரிசுகள் பெற்று வந்தவர்.
·         இவர் பாடிய நூல்கள்
1. திருக்கழுக்குன்றப் புராணம்
2. திருக்கழுக்குன்ற மாலை
3. சேயூர் முருகன் பிள்ளைத்தமிழ்
4. திருவாரூர் உலா.
5. சந்திரவாணன் கோவை
மற்றும் பல தனிப்பாடல்கள்.

பேரவையின் செயல்பாடுகளாவன, ஒவ்வொரு மாதமும் ஒருவர் அவருக்கு விருப்பமான தலைப்பில் ஆய்வுக்கட்டுரை வழங்க, மற்றவர்கள் அதில் தோன்றும் ஐயங்களை எழுப்பித் தெளிவு பெறுதல், புதிய நூல்கலை அறிமுகம் செய்தல், பல்துறை தமிழ் அறிஞர்களை அழைத்து துறைசார்ந்த அறிவை விரிவு செய்தல் என்ற முறைமைகளில் கூட்டங்கள் நடைபெறும்.
கூட்டங்கள்  கல்வி நிறுவனங்கள், பூங்காக்கள், கடற்கரைகள் என ஏதேனும் ஒரு இடத்தில் நடைபெறும். இடம் குறித்தத் தகவல் அவ்வப்போது அறிவிக்கப்படும். முதல் கூட்டம் ஆகஸ்ட் 28 2016 ஞாயிற்றுக் கிழமை 1.30 மணி முதல் 3.30 மணி வரை பத்மசேஷாத்ரி பள்ளியின் அருகில் ஓர் மரத்தடியில் நடைபெற்றது.
மாநிலக்கல்லூரியின் முனைவர் பட்ட ஆய்வாளர் திரு.சக்திவேல், செய்யாறு அரசுக் கல்லூரியில் விருந்தமை விரிவுரையாளராக உள்ள திரு. பிரதீப், மதுரவாயில் அரசு மேல்நிலைப் பள்ளியில் பட்டதாரி தமிழாசிரியராக உள்ள திரு. ராமன், ராணிமேரிக்கல்லூரி முனைவர் பட்ட ஆய்வாளர் திரு.சுதன்,,, உத்திரமேரூர் அரசுக் கல்லூரி விருந்தமை விரிவுரையாளர் திரு. பானுகோபன், மாநிலக்கல்லூரி முனைவர் பட்ட ஆய்வாளர் திரு.செல்வமணி, சோகா இகெதா கலை மற்றும் அறிவியல் மகளிர் கல்லூரி உதவிப் பேராசிரியர் திரு.பாண்டியராஜ், ராணிமேரிக்கல்லூரி முனைவர் பட்ட  ஆய்வாளர் திரு. லட்சுமிநாராயணன், ராணிமேரிக்கல்லூரி முனைவர் பட்ட ஆய்வாளர் திருமதி.வத்சலா லட்சுமிநாராயணன், திருவஞ்சேரி அரசு மேல்நிலைப் பள்ளி முதுகலைப் பட்டதாரி தமிழாசிரியர் திரு.வெங்கடேசன், உலகத்தமிழ் ஆராய்ச்சி நிறுவனம் முனைவர் பட்ட ஆய்வாளர் திரு.சிவக்குமார் போன்றோர் இணைந்து இப்பேரவையைத் தொடங்கியுள்ளனர். அனைவரும் தமிழ்த்துறையினர் என்பதுக் குறிப்பிடத்தக்கது. திரு. பிரதீப் தலைவராகவும், திரு.ராமன் செயலாளராகவும், திருமதி.வத்சலா பொருளாளராகவும் செயல்படுகின்றனர்.
அனைவரும் பங்கேற்று ஒத்துழைப்பு வழங்குமாறு பணிவன்புடன் கேட்டுக்கொள்கிறோம்.
நன்றி.

செவ்வாய், 30 ஆகஸ்ட், 2016

‘‘பழந்தமிழில் சமூக – சமய - மரபுகளும், பனுவலாக்கக் கோட்பாடுகளும்”

‘‘பழந்தமிழில் சமூக – சமய - மரபுகளும், பனுவலாக்கக் கோட்பாடுகளும்” (மு.ரமேஷ்) நூலுக்கான அறிமுககூட்டம்
        அன்புடையீர் வணக்கம்!

வருகின்ற 3-9-2016. சனிக்கிழமை காலை 10.00 மணியளவில் சென்னை -41 திருவான்மியூர், திருவள்ளுவர் சாலை 112 முதல் தளம், பனுவல் புத்தக அரங்கில்  ‘‘பழந்தமிழில் சமூக – சமய - மரபுகளும், பனுவலாக்கக் கோட்பாடுகளும்” (மு.ரமேஷ்) நூலுக்கான அறிமுககூட்டம் நடைபெறுகிறது.
கூட்டத்தில் கலந்துகொண்டு உரையாடுவோர்
.வெளி. ரங்கராஜன் (நாடகவியலாளர்) கஜேந்திரன் (ஊடகவியலாளர்) அபிலாஷ் (எழுத்தாளர்) இராமன் (எழுத்தாளர்), இளங்கோவன் (சாகித்திய அகாதமி பொறுப்பாளர், தமிழ்நாடு) கந்தசாமி (ஆய்வாளர் புதுச்சேரி) தமிழாசான் (கல்வியாளர்) கெ.குமார் பேராசிரியர் மாநிலகல்லூரி. மு.முருகேசன் பேராசிரியர் அரசு கலைக்கல்லூரி, ஆத்தூர் சேலம். பத்மநாபன் பேராசிரியர் மொழிபெயர்ப்பு துறை, திராவிட பல்கலைக் கழகம் குப்பம் ஆந்திரா. சிவராஜ் (ஆய்வாளர் தமிழியர்புலம் புதுவைப் பல்கலைக்கழகம். பிரகாஷ் ஆய்வாளர் தமிழ்த்துறை அறிஞர் அரசு கலைக்கல்லூரி வடசென்னிமலை ஆத்தூர் சேலம். பிரேமதாசன் மென்பொறியாளர் திருவான்மியூர். உள்ளிட்ட பலரும் கலந்துகொண்டு உரையாடுகிறார்கள்.
அனைவரும் வருக!.
மு. ரமேஷின் பிறநூல்கள்
கவிதை நூல்கள்
1. என் தேசத்தின் ஜதிகள் 2002.
2. வார்த்தைக்குள் சிக்காத இரவின் உயரம் 2005.
3. மழையில் கரையும் இரவின் வாசனை 2007.
சிறுகதை
1.    நிழல் சுடுகிறது 2011.
கட்டுரை நூல்கள்
1.    காட்சியதிகாரம் 2008.
2.    கவிதை இயல் மறுவாசிப்பு 2009.
3.    வரலாற்றுப் பன்மையும்  தேசிய ஒடுக்கமும் 2012.
4.    பழந்தமிழில் சமூக சமய மரபுகளும் பனுவலாக்கக் கோட்பாடுகளும் 2015.
5.    ஓர் அடிமை உடலும் மூன்று சொற்களும் (வெகுவிரைவில் வர இருக்கிறது.)

இந்த புத்தகத்தை முன்கூட்டி படிக்க விரும்புவோருக்காக செப்டம்பர் 3 ம் தேதி வரை 40% சலுகையில் வழங்கப்படும்.
தொடர்புக்கு ப. கஜேந்திரன் - 9894309067
--------------------------------- --------------------------------- --------------------------------- --------------------------------- --------------------------------- --------------------------------- ---------------------------------
Book launch function for the next creation of the famous Tamil writer ​ M. Ramesh on 3rd Sep, 2016 @ 10 am
If you are interested to read the book beforehand, we provide 40% off on the book till 3rd Sep, 2016
We cordially invite you to take part in the discussion about the book and share your thoughts.

Contact : P. Gajendran - 9894309067
தகவல் பேராசிரியர். கெ. குமார் அவர்களால் மின்னஞ்சல் மூலம் கிடைக்கபெற்றது.

செவ்வாய், 12 ஏப்ரல், 2016

பார்வையற்றோருக்கான ஐந்து நாள் கணினிப் பயிலரங்கம்


பார்வையற்றோருக்கான ஐந்து நாள் கணினிப் பயிலரங்கம்


24.05.2016 - 28.05.2016.
பதிவு செய்ய கடைசி நாள் - 06.05.2016.

அன்புடையீர்,

ப்ரேரனா ஹெல்ப் லைன் ஃபௌன்டேஷன், அரிமா சங்கங்கள் மற்றும் ஸ்ரீநிக்கேதன் மேல்நிலைப் பள்ளி அமைப்புகள் ஒவ்வொரு ஆண்டும் பார்வையற்றோருக்கான கணினிப் பயிலரங்கம் நடத்தி வருவதை அனைவரும் அறிவோம். அப்பயிலரங்கம் இந்த ஆண்டு 24.05.2016 செவ்வாய் முதல் 28.05.2016 சனி வரை திருவள்ளூரில் உள்ள ஸ்ரீநிக்கேதன் மேல்நிலைப் பள்ளியில் நடைபெற உள்ளது. வழக்கம் போல தங்குமிடம் உணவு உள்ளிட்ட  வசதிகள் செய்துத்தரப்படும். இதில் பங்கேற்க விருப்பமுள்ளவர்கள் கட்டாயமாக மடிக்கணினி கொண்டுவர வேண்டும் என்பதைத் தெரிவித்துக்கொள்கிறோம். மேலும், தங்களது பெயர், பணி அல்லது கல்வி விவரம்,, தாங்கள் பயன்படுத்தும் திரைவாசிப்பு மென்பொருள் (NVDA Or JAWS) எது, கீழேக்  குறிப்பிடப்பட்டுள்ள பிரிவுகளில் தாங்கள் எந்த பிரிவில் பயிற்சி பெற விரும்புகிறீர்கள் உள்ளிட்ட அடிப்படைத் தகவல்களை வரும் 06.05.2016 வெள்ளிக்கிழமைக்குள் திரு. ர. ராஜா  அவர்களிடம்  தெரிவித்து, பதிவுக் கட்டணம் ரூபாய் 150  செலுத்தி  தங்கள் வரவை உறுதி செய்துக்கொள்ளுபடிக் கேட்டுக்கொள்கிறோம்.  திரு. ர. ராஜா அவர்களைத் தொடர்புக்கொள்ள வேண்டிய செல்பேசி எண் 99 40 39 38 55. முதலில் பதிவு செய்யும் 50  நபர்கள் மட்டுமே பங்கேற்க இயலும்.

பிரிவுகள்


1.தட்டச்சு உள்ளிட்ட அடிப்படைப்  பயிற்சி, மைக்ரோசாஃப்ட் வேட் மற்றும் இணையம் அறிமுகம்.

2.மைக்ரோசாஃப்ட் வேட் மற்றும் இணையம்.

3.மைக்ரோசாஃப்ட் எக்சல் மற்றும் இணையம்.

4.மைக்ரோசாஃப்ட் பவர் பாய்ண்ட், லிப்ரா ஆஃபிஸ் மற்றும்  மென்பொருள் நிறுவுதல் நீக்குதல்.

அனைத்து பிரிவினருக்கும் தமிழ்த் தட்டச்சு பயிற்றுவிக்கப்படும்.

இறுதி நாள் அன்று அனைவருக்கும் பொதுவாக புக் ஷேர் பயன்பாடு மற்றும் ஆண்டிராய்டு சிறப்பு அம்சங்கள் மற்றும் தமிழ் எழுத்துணரி OCR குறித்து வகுப்புகள் நடைபெறும்.

வகுப்பு நடைபெறும் முறை


§  குறிப்பிடப்பட்டுள்ள ஒவ்வொரு பிரிவினருக்கும் தனி வகுப்பறைகள் ஏற்படுத்தப்படும்.

§  பிரிவு நான்கு தவிற மற்ற பிரிவினருக்கு தனித்தனி பயிற்றுநர்கள் அமர்த்தப்படுவர்.

§  தேவைப்பட்டால் தலைப்பிற்கேற்ப பொது வகுப்புகள் ஏற்படுத்தப்படும்.

§  வகுப்புகள் காலை 09.30 மணி முதல் 01.00 மணி வரையிலும் மீண்டும் 03.30 மணி முதல் 07.00 மணி வரையிலும் நடைபெறும்.

§  கோடைக்காலம் என்பதால் உணவு இடை வேளைக்கு பிறகு ஓய்வு நேரம் ஏற்படுத்தப்பட்டுள்ளது.

§  காலை மற்றும் மாலை வகுப்புகளுக்கிடையே தேநீர் இடை வேளை வழங்கப்படும்

பயிற்சி விதிமுறைகள்


§  அனைவரும் கட்டாயம் மடிக்கணினி கொண்டுவர  வேண்டும்.

§  இணைய வசதி செய்துத்தரப்படும் இருப்பினும் கூடுமான வரை இண்டர்நெட் மோடம் கொண்டுவருவது நல்லது.

§  பிரிவு 2, 3, 4இல்  கலந்துக்கொள்பவர்களுக்கு கணினியைத் திரைவாசிப்பு மென்பொருள் மூலம் நன்கு பயன்படுத்தத் தெரிந்திருக்க வேண்டும்.

§  பிரிவு நான்கில் பங்கேற்பவர்கள் கூடுதல் பயன்பாட்டாளர்களாக கருதப்படுவர். அவர்களுக்கென்று தனி பயிற்றுநர் அமர்த்தப்படமாட்டாது. ஒவ்வொரு தலைப்பிற்கும் ஒவ்வொரு பயிற்றுநர் வந்து கருத்துக்களைப் பகிர்ந்து செல்வர்.

மேலதிக விவரங்களுக்கு


திருமதி. பத்மா ஆனந்த் – 96 00 02 68 91.

திரு. ர. ராஜா – 99 40 39 38 55.

திரு. சே. பாண்டியராஜ் – 98 41 12 91 63.

நன்றி.....

திங்கள், 21 மார்ச், 2016

தம் வாசிப்பாளருக்கு பாராட்டு விழா நடத்திய பார்வையற்ற பேராசிரியர்!


தம் வாசிப்பாளருக்கு பாராட்டு விழா நடத்திய பார்வையற்ற பேராசிரியர்!

வைணவ கல்லூரியின் கணித பேராசிரியர், பை கணித மன்றத்தின் நிறுவனர் ரா.சிவராமன் என்கிற ராம்ஜி அவர்கள் எழுதிய கட்டுரைகள்,  அவர் விருது பெற்றது தொடர்பாக தமிழ் இந்து தினமணி போன்ற நாளிதழ்களில் வெளியான கட்டுரைகள் என பல்வேறு செய்திகள் நம் குழுமத்தில் பகிரப்பட்டு, அனைவரும் படித்திருக்கிறோம். அத்தகு சிறப்பு மிகுந்த பேராசிரியருக்கு தற்போது சமூகத்தில் உள்ள கடைநிலை மக்களுக்கும் அறிவியல் விழிப்புணர்வை ஏற்படுத்தியதற்காக இந்திய அரசு தேசிய விருது வழங்கி சிறப்பித்துள்ளது.

பல விருதுகளுக்கு சொந்தக்காரரான  இவருக்கு தற்போது தேசிய விருது கிடைத்திருப்பது இவரால் பயனடைந்து வாழ்வில் உயர்ந்துள்ள பல பார்வையற்றவர்களுக்கு மிகுந்த மகிழ்ச்சியை ஏற்படுத்தியுள்ளது. இவர் ஏறக்குறைய பதினைந்து ஆண்டுகளாக பார்வையற்றவர்களுக்கு விழியாக இருந்து வழிக்காட்டி வருகிறார் என்று சொன்னால் மிகையாகாது. இவர் குடும்பமே பார்வையற்றோருக்காக பாடங்களைப் படித்துக்காட்டி சேவைப்புரிந்துள்ளனர் என்பது மகிழ்ச்சிக்குரியது. இப்படி சேவைப்புரிந்து வரும் இவரால் வழிக்காட்டப்பட்டு இன்று பேராசிரியராக உயர்ந்துள்ள மாநிலக்கல்லூரி பேராசிரியர் கெ. குமார் ஐயா அவர்கள் இவருக்காக இன்று எக்மோரில் உள்ள ஜீவன் ஜோதியில் பாராட்டு விழா நடத்தி ஐயாவை சிறப்பித்தார்கள்.

இவ்விழாவில் மாநிலக்கல்லூரி தமிழ்த்துறைத்தலைவர் அர. ஜெயச்சந்திரன்  அவர்கள், பேராசிரியர். உத்திராபதி அவர்கள், பேராசிரியர். வேலு அவர்கள், பேராசிரியர். பழனி அவர்கள், பேராசிரியர். பசுபதி அவர்கள், திருவாரூர் அரசுக்கல்லூரி பேராசிரியர். செந்தில் அவர்கள், காரைக்குடி அரசுக்கல்லூரி பேராசிரியர். கிருஷ்ணமூர்த்தி அவர்கள், பொன்னேரி அரசுக்கல்லூரி பேராசிரியர். திவாகர் அவர்கள், பேராசிரியர் நாகராஜன் அவர்கள், மேலும் பல ஆசிரியர்கள் ஆய்வாளர்கள்  என பலர் பங்கேற்று ஐயா அவர்களுக்கு தங்களது வாழ்த்துக்களைத் தெரிவித்துக்கொண்டனர்.

இறுதியில் ஏற்புரை வழங்கிய பேராசிரியர் சிவராமன் அவர்கள் நான் விருதுப் பெற்றதற்கு எங்கும் கிடைக்காத அளவிற்கு மகிழ்ச்சியும் அங்கீகாரமும் இங்கு கிடைத்துள்ளது என்பதை மிகுந்த மகிழ்ச்சியுடன் தெரிவித்தார். மேலும் பார்வையற்றோர் எளிதில் கணிதத்தைப் புரிந்துக்கொள்ளும் வகையில் சிறந்த முறையில் ஒரு நூல் எழுதத் திட்டமிட்டுள்ளதாகவும் அது என் சமுதாயக் கடமை என்றும் ஆர்வமுடன் குறிப்பிட்டார்.  ஆய்வாளர். டேவிட்  அவர்கள் நன்றியுரை வழங்க நிகழ்ச்சி இனிதே நிறைவேறியது. இவ்விழாவில் பங்கேற்க எனக்கு வாய்ப்பளித்த  விழா ஒருங்கிணைப்பாளர் பேராசிரியர் குமார் ஐயா அவர்களுக்கு எனது நெஞ்சார்ந்த நன்றியைத் தெரிவித்துக்கொள்கிறேன்.

அவர் விருது பெற்றது தொடர்பாக தினமணி நாளிதழில் வெளியான செய்தி பின்வருமாறு....

அறிவியல் விழிப்புணர்வு :3 பேருக்கு தேசிய விருது

By சென்னை

First Published : 12 March 2016 03:44 AM IST

அறிவியல் விழிப்புணர்வு ஏற்படுத்திய தமிழகத்தைச் சேர்ந்த 3 பேருக்கு அறிவியல் தொழில்நுட்பத் துறையின் சார்பில் தேசிய விருது வழங்கப்பட்டது.

கடந்த ஆண்டுக்கான தேசிய விருது வழங்கும் விழா புதுதில்லியில் அண்மையில் நடைபெற்றது. இதில், 11 பேருக்கு விருதுகளையும், ரூ.1 லட்சத்துக்கான காசோலைகளையும் மத்திய அமைச்சர் ஹர்ஷ வர்தன் வழங்கினார்.

அதில், தமிழகத்தைச் சேர்ந்த சென்னை து.கோ. வைணவக் கல்லூரியில் கணித பேராசிரியர், பை கணித மன்றத்தின் நிறுவனர் ரா.சிவராமன், ராஜபாளையத்தைச் சேர்ந்த மருத்துவர் கணேசன், திருசெங்கோடு கே.எஸ்.ஆர். தொழில்நுட்பக் கல்லூரியின் பேராசிரியரான வெ.ராஜேந்திரன் ஆகியோருக்கு தேசிய விருது வழங்கப்பட்டது.

இதில், சிவராமனின் பல கணித நூல்கள், தமிழக அரசின் சிறந்த அறிவியல் புத்தகப் பரிசை தொடர்ச்சியாக 2 முறையும், திருப்பூர் தமிழ்ச் சங்க விருது உள்ளிட்டவைகளை பெற்றுள்ளது. மேலும், கணிதத்தின் மேன்மையை வெளிப்படுத்தும் வகையில் சொற்பொழிவுகள், பயிலரங்கத்தையும் நடத்தியுள்ளார்.

http://www.dinamani.com/tamilnadu/2016/03/12/

உலக மகளிர் தின விழாவில் தமிழக ஆளுநரிடம் விருது பெற்ற பார்வையற்ற பெண்!


உலக மகளிர் தின விழாவில் தமிழக ஆளுநரிடம் விருது பெற்ற பார்வையற்ற பெண்!

உலக மகளிர் தினத்தை முன்னிட்டு, சக்தி மண்டல் சகயோக் சார்பில் மகளிர் தினம் சென்னை, கிண்டி ஆளுநர் மாளிகை வளாகத்தில் மார்ச் 8ஆம் தேதி நடைபெற்றது. இவ்விழாவில்  பல்துறை பெண்களுக்கு தமிழக ஆளுநர் கே.ரோசய்யா அவர்கள் விருது வழங்கி சிறப்பித்தார். இவ்விழாவில் பார்வையற்ற சமூகத்திற்காக பல ஆண்டுகளாக தம் பங்களிப்பைச் செவ்வனே செய்துவரும் பார்வையற்ற பெண் செல்வி. முத்துச்செல்வி  அவர்களுக்கு சிறந்த  சமூக சேவகருக்கான விருது வழங்கப்பட்டது.

இவர், பார்வையற்றோருக்கான உரிமை, பாதுகாப்பு, இட ஒதுக்கீடு என்ர பிரச்சணைகளுக்காக தொடர்ந்து போராடி வருகிறார். பெண்ணுரிமை, பெண் முன்னேற்றம் போன்றவற்றில் இவரது பங்கு குறிப்பிடத்தக்கது. மேலும், இவர் ஏறக்குறைய ஐந்து ஆண்டுகளாக அகிலஇந்தியப் பார்வையற்றோர் கூட்டமைப்பின் செயலாலராக செயலாற்றி வருகிறார். இவர் மெம்மேலும் பல சாதணைகள் புரிய எல்லாம் வள்ள இறைவன் அருள்புரியட்டும். வாழ்த்துகள்!

நன்றி...

செவ்வாய், 5 ஜனவரி, 2016

பார்வையற்றோர் வாழ்வில் 2015



பார்வையற்றோர் வாழ்வில் 2015

ரா. பாலகணேசன்,   அருப்புக்கோட்டை
  பார்வையற்றோர் வாழ்வில் 2015-இன் பங்களிப்பு எப்படி இருந்தது?
சுருக்கமான பின்னோட்டமாய் இக்கட்டுரை.

தமிழகம்

  *10 மற்றும் 12-ஆம் வகுப்புகளில் முதல் 10 இடங்களைப் பெறும்  பார்வையற்றோர் குறித்த தகவல்களை அரசே தனது அறிவிக்கையில் வழங்கத் தொடங்கியது இந்த ஆண்டில்தான்.
  *கடந்த மார்ச் மாதம் வேலை வாய்ப்பு உள்ளிட்ட பல்வேறு கோரிக்கைகளை  வலியுறுத்தி பார்வையற்ற கல்லூரி மாணவர்கள் மற்றும் பட்டதாரிகள்  சங்கத்தின் சார்பில் போராட்டங்கள் நடைபெற்றன. பல அரசியல் கட்சிகளும்,  சமூக அமைப்புகளும் போராட்டத்தை ஆதரித்தன. இருந்தபோதிலும், திடமான தீர்வு  இன்றியே போராட்டம் முடிவடைந்தது.
  *பார்வையற்றோருக்கான முதல் கல்வியியல் கல்லூரி சென்னை நேத்ரோதயா  நிறுவனத்தின் சார்பில் செயல்படத் தொடங்கியது.
  *தமிழகத்திலேயே முதல் முறையாக, தம் கல்லூரியில் பயிலும் பார்வையுள்ள மாணவர்களுக்கு பார்வையற்றோர் குறித்த விழிப்புணர்வை ஏற்படுத்தும் வகையில்,சென்னை மாதனாங்குப்பம் பகுதியில் உள்ள சோகா இகேதா கலை மற்றும் அறிவியல் மகளிர்க் கல்லூரி, தேசிய பார்வையற்றோர் சங்கத்துடன் (NAB tamilnadu) இணைந்து பார்வையற்றோருக்கான தொழில்நுட்பக் கல்விக்கான சான்றிதழ் படிப்பைத் தொடங்கியது.
  *தமிழகத்தைச் சேர்ந்த பெனோசெபைன் என்ற பார்வையற்ற பெண் முதல்  பார்வையற்ற அதிகாரியாக இந்திய வெளியுறவுத் துறையில்  பொறுப்பேற்றுக்கொண்டார்.
  *கோயம்புத்தூரைச் சேர்ந்த சபரி வெங்கட் என்ற பார்வையற்ற சிறுவன் சிறந்த  மாற்றுத்திறனாளிக்கான தேசிய விருது பெற்றார். இவர் சிறந்த பேச்சாளர்,  பலகுரல் வித்தகர்.
  *தஞ்சாவூர், பூவிருந்தவல்லி ஆகிய இடங்களில் உள்ள பார்வையற்றோர்  பள்ளிகளில் ஆசிரியர்கள் பற்றாக்குறை நிலவுவதாக மாணவர்கள் போராட்டம்  நடத்தினர். இதன் விளைவாக, சிறப்புப் பள்ளிகளில் உள்ள காலியிடங்களை  நிரப்பும் அறிவிப்பை தமிழக அரசு வெளியிட்டுள்ளது.
  *’பிரெயில் மஞ்சரி’ என்ற புதிய பிரெயில் இதழை மதுரை IAB பிரெயில்  அச்சகம் தொடங்கியுள்ளது.. அடுத்த ஆண்டில் ‘பிரெயில் பார்வை’ என்ற  பெயரிலான இதழை மத்திய அரசு நிறுவனமான NIVH தென்மண்டல மையம்  வெளியிடவிருக்கிறது.
  *தமிழக வெள்ளப் பெருக்கு பார்வையற்றோரையும் வெகுவாக பாதித்தது. சென்னை  சிறுமலர் பார்வையற்றோர், காது கேளாதோர் பள்ளி மாணவிகள் வெள்ளத்தின்போது  கடும் அவதிக்கு உள்ளாகினர். இசையமைப்பாளர் இளையராஜா இவர்களுக்கு உதவிய  செய்திகள் சமூக வலை தளங்களில் பாராட்டு பெற்றன.    பார்வையற்ற கல்லூரி மாணவர்கள் மற்றும் பட்டதாரிகள் சங்கம் வெள்ளத்தில்  முற்றும் முழுதாகச் சேதமடைந்தது. சங்கத்தின் ஆவணங்கள், உபகரணங்கள்  முதலியவை பெருமளவில் அழிந்துவிட்டன.

இந்தியா

  *மத்திய அரசின் அதிகார எல்லைக்கு உட்பட்ட வகையில் இன்னும் 14327  மாற்றுத்திறனாளிகளுக்கான பணியிடங்கள் நிரப்பப்படாமல் இருப்பதாக மத்திய  இணையமைச்சர் ஜிதேந்திரசிங் தெரிவித்தார். நாடாளுமன்ற மழைக்காலக்  கூட்டத்தொடரில் இத்தகவலை  அவர் வழங்கினார்.
  * நாடெங்கும் இருக்கும் மாற்றுத்திறனாளிகள் அனைவருக்கும் ஒரே வகையான  நவீன அடையாள அட்டை வழங்கப்படும் எந மத்திய அரசு அறிவித்தது.
  *ஏப்ரல் 2017-க்குள் இந்திய அரசின் அனைத்து அலுவலகங்களும், பொதுத் துறை  நிறுவனங்களும் மாற்றுத்திறனாளிகள் அணுகுவதற்கேற்ற வகையில் அமைக்கப்படும்  என மத்திய அரசு உறுதியளித்துள்ளது.
  *பார்வையற்ற பள்ளி மாணவர்களுக்கு தொட்டுணரும் வரைபடங்களுடன்கூடிய  பிரெயில் புத்தகங்களை வழங்கும் திட்டத்தை NCERT தொடங்கியது.
  *சுற்றுலாத் தளங்கள் பார்வையற்றோருக்கு ஏற்றாற்போல் அமைக்கப்படவேண்டும்  என்ற இலக்கில், முதல்கட்டமாக வடகிழக்கு மாநிலங்களில் உள்ள சுற்றுலாத்  தலங்களில் பிரெயில் விவரணைகள் இந்த ஆண்டில் ஏற்படுத்தப்பட்டது.
  *ரயிலில் படுக்கை வசதி கேட்டு முன்பதிவு செய்யும்  மாற்றுத்திறனாளிகளுக்கு கீழ்ப் படுக்கையும், அவர்களது உதவியாளர்களுக்கு  நடுப் படுக்கையும் கட்டாயம் வழங்கப்படவேண்டும் என இந்திய ரயில்வே ஆணை  பிறப்பித்துள்ளது.
    *மைசூர் ரயில் நிலையம் மாற்றுத்திறனாளிகளுக்கேற்ற முதல் ரயில்  நிலையமாக அறிவிக்கப்பட்டிருக்கிறது.
  *பார்வையற்றோர் தங்கள் சிக்கல்களையும், ஐயங்களையும் போக்கிக்கொள்ளும்  வண்ணம் இலவசத் தொலைபேசி ஆலோசனைச் சேவை இந்த ஆண்டில் தொடங்கப்பட்டது.  மத்திய அரசின் உதவியுடன் eyeway நிறுவனத்தால் நடத்தப்படும் இச்சேவையில்  பார்வையற்றவர்கள் எந்த இந்திய மொழியிலும் தங்கள் கேள்விகளைக் கேட்கலாம்.
தொலைபேசி எண்: 1800-300-20469.

நீதி

  *மாற்றுத்திறனாளிகளுக்கான இட ஒதுக்கீட்டை உறுதியாக அமல்படுத்தவேண்டும்  என்ற நீதிமன்றத் தீர்ப்பையடுத்து இந்திய ரயில்வே, BSNL, நெய்வேலி  நிலக்கரி நிறுவனம் முதலியவை மாற்றுத்திறனாளிகளுக்கான சிறப்பு  வேலைவாய்ப்பு அறிவிப்புகளை விடுத்துள்ளன.
  *ஆசிரியர் பயிற்றுநர்கலாகப் பார்வையற்றவர்களை நியமிப்பது தொடர்பான  வழக்கில் சென்னை உயர்நீதிமன்றத்தில் தனது கருத்துரையை வழங்கிய பள்ளிக்  கல்வித் துறை செயலர் திருமதி. சபிதா, ‘ பார்வையற்றவர்கலைச்  சராசரியானவர்களாகக் கருதமுடியாது; எனவே இப்பணியில் அவர்களை  நியமிக்கமுடியாது’ என்று கூறிய கருத்துகளை நீதிமன்றம் கண்டித்தது.  சபிதாவின் இக்கருத்து பரவலாக கண்டனத்துக்குளானது.
  * பாண்டியன் கிராம வங்கியின் வேலை வாய்ப்பு அறிவிப்பில்  பார்வையற்றோருக்கான இடங்கள் குறித்த தகவல் இல்லாமல் இருந்ததை நீதிமன்றம் கண்டித்தது. டெல்லியைத் தலைமையகமாகக் கொண்ட AICB தொடுத்த வழக்கில் வங்கி  பார்வையற்றோருக்கான வேலை வாய்ப்பை உறுதிப்படுத்தவேண்டும் என தீர்ப்பு வழங்கப்பட்டது.
  *2008-ஆம் ஆண்டு பெரம்பலூரில் நடத்தப்பட்ட கண் சிகிச்சை முகாமில்  செய்யப்பட்ட தவறான அறுவை சிகிச்சை காரணமாக 66 பேர் பார்வையிழந்தனர். இது  தொடர்பான வழக்கில், தொடர்புடைய மருத்துவர்களுக்கும், மருத்துவமனை  நிர்வாகிகளுக்கும் ஓராண்டு சிறை தண்டனை அளித்து திருச்சி நீதிமன்றம்  தீர்ப்பளித்தது. தவறான சிகிச்சைக்கு எதிராக இந்திய அளவில் முதல்முறையாக  வழங்கப்பட்ட தீர்ப்பு இது.
  *சுரேந்திரமோகன் என்ற தமிழகப் பார்வையற்ற வழக்கறிஞருக்கு நீதிபதி பணி  தரப்படவேண்டும் என்ற தீர்ப்பும் இந்த ஆண்டில்தான் வெளியானது.
  *மதுரை அரசு மருத்துவமனையில் தங்கள் குழந்தையைத் தொலைத்த  முத்துமாணிக்கம், மாரீஸ்வரி இணையருக்கு 9 ஆண்டுகளுக்குப் பிறகு  நீதிமன்றத் தீர்ப்பின் காரணமாக ரூ. 3 லட்சம் இழப்பீடாக வழங்கப்பட்டது.

அறிவியல் தொழில்நுட்பம்

   பார்வையற்றவர்களுக்குப் பார்வை தரும் பொருட்டும், தற்போதைய நிலையில்  தொழில்நுட்ப உதவி வழங்குவது குறித்தும் தொடர்ந்து ஆய்வுகள்  மேற்கொள்ளப்பட்டு வருகின்றன.
  *பார்வையற்றோர் தானாக பணிபுரியும் வண்ணம் கட்டுமானக் கருவியைக்  கண்டறிந்தார் மதுரையைச் சேர்ந்த மனோகரன். இக்கருவியைப் பயன்படுத்துவது  குறித்து பல பார்வையற்றோருக்குப் பயிற்சியளித்துவருவதாக இவர்  தெரிவித்தார். உடலுழைப்பில் ஈடுபட விரும்பும் பார்வையற்றோருக்கு இது ஒரு  வரம்.
  *மீயொலி --முப்பரிமாண அச்சுக்கருவி (ultrasound 3d printer)இந்த ஆண்டு  கண்டுபிடிக்கப்பட்டது. பார்வையற்றோரால் காணமுடியாத பிம்பங்களுக்கு  (images) வடிவம் கொடுக்க இது உதவும். சான்றாக, பிரேசில் நாட்டில் கருவில்  இருக்கும் தன் குழந்தையின் உருவை ஒரு பார்வையற்ற தாய் தொட்டுணர்ந்த  செய்தி நம்மை வியப்பில் ஆழ்த்தியது.
  கூகுல் நிறுவனம் தயாரித்த OCR-ல் தமிழ் இடம்பெற்றிருப்பது, கர்நாடக  மாநிலத்தில் தமிழ், கன்னடம் ஆகிய மொழிகளுக்கான திரைவாசிப்பானின்  உருவாக்கம் ஆகியவை கணினி பயன்படுத்தும் தமிழ் பார்வையற்றோருக்குப்  பயன்படுபவை.
   கூகுல் நிறுவனம் தயாரித்த ஓட்டுநர் தேவையில்லாத காரை ஏற்றுக்கொள்வது  குறித்து பல நாடுகள் பரிசீலித்துவருகின்றன.
  இவை தவிர பார்வையற்றோர் கணினி, அலைபேசி ஆகியவற்றை எளிமையாகக் கையாள,  அவற்றின் மூலம் பல தகவல்களை விரைவாக அறிந்துகொள்ள பல்வேறு செயலிகள்  வெளியாகிவருகின்றன.

ஊடகம்

  *’கண்ணு தெரியலைண்ணா உலகத்தச் சுத்திப்பார்க்க முடியாதா தாத்தா?’ என்று  ஒரு பெண் கேட்பதாக வடிவமைக்கப்பட்ட VIP சூட்கேஸுக்கான விளம்பரம் இந்த  ஆண்டு வெளியாகி தன்னம்பிக்கையை வளர்த்தது.
  *ஸ்ரீராம் என்ற 10 வயதுச் சிறுவன் லோட்டஸ்நிய்யூஸ் தொலைக்காட்சியின்  சிறப்புச் செய்திவாசிப்பாளராக பணியமர்த்தப்பட்டார். பார்வையற்றோர்  கல்வியை ஊக்குவிக்கும் பொருட்டு இம்முயற்சி எடுக்கப்பட்டதாக தொலைக்காட்சி  நிர்வாகம் கூறியது. சனிக்கிழமைதோறும் மாலை 5 மணிக்கு ஒளிபரப்பாகும் ‘அகக்கண்’ என்ற அரைமணிநேர நிகழ்ச்சியில் பிரெயில் முறையைப் பயன்படுத்தி  செய்தி வாசிக்கிறார் ஸ்ரீராம்.
  *விஜய் தொலைக்காட்சியின் சூப்பர் சிங்கர் நிகழ்ச்சியில் தன்  பாட்டாலும், பலகுரல் வித்தையாலும் அனைவரது மனதிலும் இடம்பிடித்தார்  இர்வின் விக்டோரியா என்ற பார்வையற்றவர். முதன்மையான 10 (Top 10)  போட்டியாளர்களுள் ஒருவராக வந்த முதல் பார்வையற்றவர் இவர்.
  *பார்வையற்றவர்களைத் தலைமைப் பாத்திரங்களாகக் கொண்டு ‘மெல்லத் திறந்தது  கதவு’ என்ற நாடகத் தொடரை z தமிழ் தொலைக்காட்சி ஒளிபரப்பிவருகிறது.  திங்கள் முதல் வெள்ளி வரை இரவு 8 மணிக்கு ஒளிபரப்பாகும் இத்தொடர்  பார்வையற்றோர் வாழ்க்கை, அவர்கள் கல்வி பெறும் நிறுவனம் சார்ந்த அரசியல்  முதலியவற்றை அடிப்படைக் கதையாகக் கொண்டுள்ளது.

விளையாட்டு

  வழக்கம் போலவே இந்த ஆண்டும் பார்வையற்றோருக்கென பல விளையாட்டுப்  போட்டிகள் நடத்தப்பட்டன.
  *டிசம்பர் மாதம் நடைபெற்ற தேசிய அளவிலான பார்வையற்றோர் கிரிக்கெட்  போட்டியை Dd sports தொலைக்காட்சி நேரடியாக ஒளிபரப்பியது. இத்தகைய  போட்டிகலை நேரடியாக ஒளிபரப்புவது இதுவே முதல்முறை.
  *அடுத்த ஆண்டில் இந்தியாவில் நடைபெறவிருக்கும் ஆசியக் கோப்பை  கிரிக்கெட் போட்டிகளில் பாதுகாப்புக் காரணங்களால் தங்களால்  கலந்துகொள்ளமுடியாது என பாகிஸ்தான் பார்வையற்றோர் கிரிக்கெட் அணி  அறிவித்தது துரதிஷ்டவசமானது.

இறப்புகள்

  *இந்திய நாடாளுமன்றத்தின் முதல் பார்வையற்ற உறுப்பினரான சதன் குப்தா  இந்த ஆண்டு காலமானார். வயது 98. மேற்குவங்கத்தைச் சேர்ந்த இவர்  பொதுவுடைமை இயக்க ஆர்வலர்.
  *பார்வையற்ற ஹிந்தி திரையுலக இசையமைப்பாளர் ரவீந்திர ஜெய்ன் இந்த ஆண்டு  காலமானார். இவர் பாடலாசிரியராகவும், பாடகராகவும் புகழ் பெற்றவர்.  தெனிந்தியப் பாடகர் K.J. ஜேசுதாஸ் அவர்களை ஹிந்தி திரையுலகிற்கு  அறிமுகப்படுத்தியவர் இவர்.
  *பழம்பெரும் தமிழ் பக்திப் பாடகர் பித்துக்குலி முருகதாஸ் காலமானார்.  இவர் ஒரு கண் பார்வையை இழந்தவர்.

எதிர்பார்ப்பு

  ஐநா வடிவமைத்துத் தந்த UNCRPD-யை அடிப்படயாகக் கொண்ட  மாற்றுத்திறனாளிகளுக்கான புதிய சட்டம் அடுத்த ஆண்டாவது நிறைவேற்றப்படும்  என்ற எதிர்பார்ப்பு ஒவ்வொரு மாற்றுத்திறனாளியிடமும் இருக்கிறது.

  (குறிப்பு: கட்டுரையில் புள்ளிவிவரக் குறைபாடுகள் இருப்பின், வேறு  விஷயங்கள் விடுபட்டிருப்பின் பதிவர்கள் தெரிவிக்க வேண்டுகிறேன். பதிவுகள்  அவசியம்தானே!)
கட்டுரை முழுமை பெற உதவிய கவிஞர் சுகுமாரன், பொன். சக்திவேல், பொன்.  குமரவேல், J. யோகேஷ், அலகாபாத் வங்கிப் பணியாளர் முத்துச்செல்வி, சென்னை பேரா. பாண்டியராஜ் ஆகியோருக்கு என் நன்றிகள்.